Comun di Sant Zorē di Noiār

L’ART

passa alla versione italiana versione italiana

La glesie parochiâl

La glesie parochiâl di Sant Zorç e je un moderni edifici fat su intal 1952 su di un progjet dal architet Giacomo della Mea. La faciade e la zone presbiteriâl a son stadis finidis intal 1973 dal architet Luciano Ria. La faciade a cjampane, cuvierte di malmui a doi colôrs, e je sbusade di un grant voli e, inte bande di sot, e à cinc nichis cuspidâdis. In trê di lôr si cjate une puarte. Il dentri, fat a aule, al ven animât da travieduris di ciment armât.

La vecje glesie

La vecje parochiâl, Glesie de Madone Dolorade, dal ‘1700, e je une costruzion alte cuntune faciade dignitose e un portâl cun parsore un grup scultori che al mostre Sant Zorç e il drâc. Dentri a son in deposit des telis che a vegnin di Vignesie: Vignesie in tron e la Justizie che e fâs scjampâ i vizis, opare di Pietro Malombra (1556-1616), si cjatave in origjin intal Palaç Ducâl intal uffizi dai “Signori di Notte del Criminale” e e rive a Sant Zorç intal 1885.

Une opare magnilocuent che e ricuarde il mistiâr dal Tintoretto, e je il Miracul de partoriente in rive al mâr fate di Alessandro Varotari clamât il Padovanino (1158-1648), rivade intal 1887 de soprimude glesie veneziane di Sante Marie Majore.

Une opare complesse e plene di particulârs, une vore grande (490 x 636 cm) e di buine fature e je Sant Bernart e Sancha di Spagne fate da Pietro Muttoni clamât il Vecchia ator dal 1640.

Lis primis dôs telis, pene rivadis a Sant Zorç, a forin restauradis dal pitôr Domenico Fabris di Osôf. A lui i fo fate fâ ancje la piture de volte cun la Salus infirnorum (1890). Il fresc al colà intal 1942 e al fo rifat di Silvio Pavon.

A van nomenâts ancie il dipint cul Triond di Sant Zorç (1838), opare modeste dal pitôr di Cjarisà Valentino Marani, e la pale cun la muart di Sant Josef di Antonio Fantini (1851).
L’altâr majôr, dal 1700, al è in marmul e lis statuis a son dai Sants Michêl Arcagnul e Jacum