Comun di Sant Zorē di Noiār

LA StoriE

passa alla versione italiana versione italiana

Sant Zorç di Noiâr al à une origjin une vore antighe documentade dai numerôs rescj archeologjics cjatâts. La zone e faseve part de aree sot de citât di Aquilee. Par ca e passave la vie Anie che puartave di Padue a Aquilee. Lunc cheste strade a son nassûts e cressûts i cuatri paîs plui antîcs: Cjarisà, Çucule, Borc di Sore e Ziline.
Intai secui seguitîfs la espansion urbane si sposte plui a sud, dulà che vuê si cjate Sant Zorç dal non di origjin medievâl.

Il cult dal famôs martar orientâl al ven puartât in ocident dai Bizantins che a comandin il Friûl prime dai Langobarts.
La sô venerazion e cres une vore dilunc dal periodi des crosadis cuant che al ven viodût tant che il sant che al jude i soldâts cristians in tiere sante. In cheste epoche si pant la liende de fantate che lui al dilibere dal drâc.
Cuant che intal 1969 al ven fat il gnûf calendari universâl roman la fieste dal 23 dai Avrîl a ven mantignude.

Inte ete di mieç Sant Zorç al va daûr il destin de regjon cun in prin il domini dai patriarcjis di Aquilee e dopo chel de Republiche di Vignesie. Un moment decisîf de nestre storie e je stade la Diete di Worns dal 1521. In che ocasions, Sant Zorç, adun cun altris vilis furlanis, al passe sot de Austrie. Cu la tierce vuere di indipendence, Sant Zorç al devente un paîs di confin cul Friûl orientâl restât sot de Austrie.

Graziis a cheste posizion di confin a Sant Zorç di svilupin dute une schirie di cumierçs locâi e internazionâi, di ativitâts marcantilis, vie tiere e vie puart, e di ativitâts artesanâls cun efiets positîfs ancje tal svilup de produzion agricule.

Inte prime vuere mondiâl e ven fondade la universitât Castrense pai students di medisine clamâts a fa il soldât, cuntun cors di medisine e chirurgjie. A vegnin fatis su des barachis par durmì, par il refertori e pes aulis di lezion; la sale cinematografiche Maran e ven doprade tant che sale coletive, la sale grande dal palaç comunâl tant che aule magna, la cele mortuorum dal simitieri tant che aule di anatomie.
I miedis laureâts a son stâts 1200, e di Sant Zorç a partivin par i cjamps di bataie dulà che e jere simpri plui dibisugne de lôr opare.
Intal prin dopovuere la risorse principâl dal comun e reste la agriculture. Atôr di jê a lavorin la grant part des aziendis artesanâls e des piçulis industriis.

La seconde vuere mondiâl a puarte in ereditât une grande crisi economiche tant al è vêr che si à une costante cressite de emigrazion.

Intai ultins decenis Sant Zorç e à vût une notevule riprese ancje graziis ae istituzion de zone industriâl clamade Ausse-Cuar par jessi stade fate fra la fôs dai doi flums.

Leât ae ativitât de zone industriâl al è il Puart Noiâr (il sôl puart de Provincie di Udin) sul flum Cuar. Lis marcjanziis plui presintis a son stadis il fier, i legnams e la cjarte (imbarcjadis); rotams di fier e ghise, prodots chimics e ciment (sbarcjadis). Sul flum Cuar a si cjatin ancje des modernis darsenis che a puedin ospitâ plui di 500 puescj barcje.

San Zorç di Noiâr al à ancje cetantis e nomenadis societâts sportivis, che a puedin doprâ dai imprescj e implants ae avanguardie, dal Palaç dal Sport al gnovissim Cjamp Sportîf, dal Centri Canoe e Canotaç, al Cjamp di Baseball.

Une vore di cualificâts a son i servizis ufierts in cjamp socio assistenziâl che a van da une Cjase di Polse che e ten 140 anzians, a intervents di sostegn aes personis plui debilis. Significative e je la realtât culturâl par merit di une Biblioteche furnide di un ric patrimoni librari e di un tiessût di scuelis preseadis pe validitât de ufierte formative insiorade de resinte istituzion dal Istitût Tecnic Industriâl ‘A. Malignani’, centri dal futûr pôl tecnic professionâl.

Par altris informazions storichis su lis variis localitâts dal Comun, o podeìs visitâ lis pagjinis de sezion il paîs.