Comun di Sant Zorç di Noiâr
Cjarisà
versione italiana
Significât dal non:
Il non al ven dal prediâl Caris(i)acum ven a stâi il possediment di Caris.
Prediâl = I toponims prediâi (o fondiaris) a son leâts al sistemi roman di centuriazion ven a stâi la division dal teren in apeçaments di dâ ai colons. Ognidun di chescj possediments al finive scuasit simpri cul clamâsi cul non dal proprietari cuntun sufìs agjietivâl –ana o –anum (al cuâl al corispuindeve il celtic –acum, -icum, -acu dal latin doprât a Aquilee, se la popolazion e jere di origjin indigjene). Par esempli: Praedium Cervenianum (ven a stâi possediment di Cervenius), vuê al è Çarvignan; Domus Athisiana (ven a stai cjase di Athisius), vuê e je Tisane. (DT).
Ubicazion:
Cjarisà, frazion di Sant Zorç, si cjate a soreli jevât dal cjâf lûc, su la çampe dal flum Cuar.
In origjin la zone e jere probabilmentri lenzude dal flum. Cuant che al è stât fat il rilevament, intal inizi dal XIX secul, la zone clamade Cjarisà inte antighitât si cjatave dividude in dôs bandis, une sot dal comun censuari di Cjarisà e une sot Çucule. La spiegazion di chest gambiâmint e stâ inte facilitât che a àn i flums in dilunc dai secui, di gambiâ il lôr cors, par chest si pense che al sedi stât il gambiâmint dal cors dal Cuar a dividi la zone in doi.
La part che si cjate a Cjarisà e confine a nord e a ovest cul flum Cuar, a est cule braide Rivate e a sud cul paîs. La part che si cjate a Çucule e confine a nord cun Vedroç, a sud cul Prât de Fontane, a est cul Cuar e a ovest cun Fontane.
Notis di storie:
Fin dal 1149 si cjate tai vecjos diplomis un Varnerius du Carisach, clamât ancje Carisaco, che intal 1158 al fâs une donazion di bens alodiâi in Cjargne ae Abazie di Mueç.
Intal 1269 un Andrietto al jere cjapitani in Cjarisà.
Intal 1288 un Anselmus de Carisaco erat cun D.Artuico de Castello tempore expugnationis Marani.
Intal 1296 alli 6 gennaio è statuito quod homines de Aquileja de Carisaco et Villanova valeant buscare in busco de Zumel excepto busco de Ruvedola.
Intal 1274 siôr Leandro di Breçà di sore, cui soi fradis q.m D.Artrasio, a ricognossin di vê de glesie di Aquilee in feut ret e legâl, dute Vilignove che si cjate inte plêf di Porpêt sot Cjarisà cun dutis lis pertinencis e i boscs.
Intal 1308, un Enselino o Anselino che al veve feut di abitance in Cjarisà par il patriarcje di Aquilee Otobon, al devente marchês de Istrie; intal 1324 Bertolotto fi di chest Anselm al jere podestât di Maran.
Intal 1372 la gastaldie di Cjarisà e ven dade a Giovanni Lissone.
Intal 1376, il patriarcje di Aquilee al dâ un mâs feudâl di abitance in Cjarisà a Francesco q.m. Matiosso di Cjarisà.
Intal 1389 la Gastaldie di Cjarisà si fitave par dîs marcjis di denârs al an. Cheste gastaldie e veve di jessi une des tantis gastaldiis sot dal Gastalt o dal Cont di Gurize tant che Dael, Pleç e vie indenant.”
Notis par cure di Luigi Del Piccolo (Luîs Dal Piçul) – Vice president de Associazion culturâl 'Ad Undecimum'.