Comun di Sant Zorç di Noiâr
Il cjâf lûc S. Zorç
versione italiana
Sant Zorç di Noiâr
Significât dal non:
Il non dal comun di Sant Zorç di Noiâr al ven dal popolâr sant vuerîr Zorç che al è vivût fra il III e il IV secul d.C. e che al murî martar par decapitazion, probabilmentri intal 303 ai timps dal imperadôr Dioclezian. Sant Zorç al jere za venerât dai Bizantins tant che sant soldât e al è stât une vore amât dai Langobarts che di pôc a vevin lassat il paganisim.
Si pense che il non de localitât e podedi jessi di chest ultin periodi (VI-VIII secul).
Ubicazion:
Cjâf lûc, toponim antîc.
Superficie 25,49 Kmc, altitudin metris 7 parsore dal nivel dal mâr.
Il comun di Sant Zorç al confine cun Porpêt a nord, cun Maran e la so marine a sud, cun Tor di Zuin a sud est, cun Cjarlinis a sud ovest e cun Cjasteons di Strade a ovest. Intal 1810 (DDVV), il comun di Sant Zorç al veve 2123 abitants cu lis frazions di Cjarlins, Cjarisà, Malisane, Noiâr, Tor di Zuin, Ziline e Çucule, intal 1883 (SGCE) a 'nd veve 3804.
Il 31 – 12 – 1990, date dal ultin rilevament demografic, il comun, cence plui Malisane e Tor di Zuin ma cun Borc Julian e i Gjai al conte 7492 personis
Notis storichis:
Il plui antîc document scrit che si cognossedi al è dal 1031 e al nomine la VILLAM SANCTII GEORGII. I rescj archeologjics romans cjatâts inte parochiâl e lis olmis de antighe viabilitât a fasin par altri pensâ che il lûc al fos abitât ancjemò prime de cristianizazion.
No si sa cuâl che al fos il non dal antîc insediament, probabilmentri al jere Mutatio ad Undecimum (stazion di ristôr e di cambi dai cjavai ae decime prime mie partint di Aquilee) dilunc la impuartante vie Anie.
Un altri document, dal 1443, al nomine la glesie di Sancti Georgy martiris (1991, D.FRANGIPANE), omonime al paîs. 1563, 1688, 1740, San Zorzi (mapis de cartografie venite). Intes sôs variis formis, Sant Zorç al ven citât ancje in altris documents a partî dal 1429, 1466 (STC), 1500, 1530, 1537 (SGCE 1985).
Glesie da Madone, Glesie Vecje
Significât dal non
Il non al ven dal fat che parsore di un altâr e je custodide la sacre imagjine di len de (Madone) Vergjine Dolorade. Intal XVIII sec a Sant Zorç a fo une tremende epidemie che in pôc a fasè murì 168 di lôr. Intal 1800 la statue de Madone, ordenade de popolazion a un artesan venezian a ricuart dal vôt fat ae Vergjine intal 1759, e rivà di Vignesie cu la barcje dai Fornezza e e vignì poiade sul altâr. Ogni an la popolazion e fâs une grande procession par ricuardà la fin de epidemie.
Ubicazion
Sant Zorç di Noiâr. Parochiâl in place Plebiscito.
Notis storichis
Il sgjâf archeologjic fat inte istât dal 1988 durant il restaur de glesie parochiâl e à palesât lis struturis di trê glesiis fatis su prime di che di cumò datade de fin dal ‘700. La prime, dal V secul, a nus prove la esistence za di alore di un plêf il cui titul purtrop no savìn.
Si trate di une basiliche paleocristiane cuntun implant retangolâr, cuntune cube retangolâr inscrite origjinariementri mosaicade e cuntun orientament canonic incentrât sul as est ovest. No si àn indizis de sô fin ancje se la mancjance di segns di fûc o di distruzion a fasin pensâ a un so lent abandon. Si à di visâsi che chel al fo un secul di vueris e di invasions, al fâs pensâ il fat che la invasion di Atile e je juste dal 452.
La seconde costruzion e je datade ator dal VI/VII secul, al somee che a sedi la prime glesie dedicade a SANT ZORÇ MARTAR, venerât une vore inte etât Langobarde. Cheste glesie e jere mancul siore di che di prime. Lu si capìs ben des dimensions plui piçulis e dai materiâi doprâts, ducj di repeç.
Intal XIV/XV secul la comunitât di Sant Zorç, cressude di numar, e sint la bisugne di une glesie plui grande. No dome che di prime e ven ingrandide ma al ven fât su un edifici gnûf tignint dut câs simpri il stes orientament.
Al è di chest periodi il prin document scrit cul non de glesie ecclesiam sancti Georgiy Martiris , datât 24 di Avrîl 1443. Al conte de visite dal Vescul di Pedena che la consacre adun dal simitieri: il document, membranacei, al è alegât al archivi di famee dai Frangipane (A1991, D.FRANGIPANE, pp.149,150). Nol passe tant timp de costruzion dal gnûf edifici che al ven ancjemò ingrandît e cheste volte al ven cambiant dal dut l’orientament de cube.
L’altâr al ven spostât de aree est de glesie in chê ovest, posizion che e je dopo restade ancje al dì di vuê. Inte seconde metât dal XVIII secul la comunitât sanzorzine e à sintût la necessitât di fa su une gnove glesie. La storie de sô costruzion e je stade pluitost problematiche tant al è vêr che e je stade finide nome intal 1798, 30 agns dopo dal inizi dai lavôrs.
Inte ultime domenie di Avost dal 1871 l’arcivescul di Udin Emanuele Lodi, sot il pontificât di pape Gregori XVI, e sot il ream di Ferdinant I di Austrie, al faseve la glesie filiâl di Sant Zorç tant che parochiâl, e la stacave de Plêf di Porpêt. Ai 2 di Avost dal 1835 al rivave il prin plevan, don Amedeo Rizzi di Udin (A1992, AD UNDECIMUM,p.161). Vuê e ven clamade ancje glesie vecje, parochiâl, di Sant Zorç Martar.
Notis par cure di Luigi Del Piccolo (Luîs Dal Piçul) – Vice president de Associazion culturâl 'Ad Undecimum'.