Comun di Sant Zorç di Noiâr

I Gjai

passa alla versione italiana versione italiana

Significât dal non:

Il non al è une rielaborazion dal langobart gahagi, todesc gehege, che al vûl dì “teren sierât, teren cintat” (1992, C.C.DESINAN), dopo interpretât come l’animâl “gjal”.

Ubicazion e notis storichis:

Gjai, e je une frazion di Sant Zorç (CB52,MC9A 1951), dal non recent (DC n°71/1959). Si rive di Sant Zorç lant su la SS14 fin a la crosere cu la strade dal Boscàt, juste prime di rivâ a Ziline, zirant a çampe pe vie Toppo Wasserman. L’abitât dai Gjai al è a un 200 metris passade la ferovie Triest Vignesie par il gnûf sotpàs. Si rive ai Gjai ancje lant pe omonime vie partint de vie Lusinç di Sant Zorç.
Il borc al è nassût intal 1948, subit dopo la seconde vuere mondiâl. Il sindic di Sant Zorç dal timp, l’ing. Marcello Smith, viodude la bisugne de popolazion di une aree par fâsi su la cjase, al à fat erizi un edifici cun dîs abitazions popolârs. Al à vendût i terens dal Bosc Gjai di pôc disboscât dulà che diviers di lôr si son fâs su la cjase fasint cussì nassi la gnove frazion. La lûs eletriche e je rivade intal 1954 (ASCC).

E je ancje une liende che i vecjos ancjemò a contin su la antighe origjin dal non.
“Inte localitât dai Gjai, dongje il borc dal dì di vuê, inte antighitât a rivarin ju des Alps i Gjai. Al jere un popul pacific che, sburtât de fan, al cirive un puest dulà sta. La liende e conte che chel popul al veve tacât la costruzion di une citât cuant che il re di Rome si oponè. Vuê, dulà che si pense che si jerin insediâts, si cjatin dai rescj: modons, cops rots, tocs di cuet e une vore di altre robe. Tant timp fa i vecjos e disevin ancje che, prime de canalizazion dal Zeline (il flum che al passe li dongje), chest puest al jere bas e paludin. I cjaçadôrs di alore e contavin che si rivave ancjemò a viodi cualchidun dai mûrs antîcs. A jerin mûrs bas e tapossâts di canis e pantan. A disevin che a ricuardavin i casons dai maranês e che a jerin ce che al jere restât de antighe citât sdrumade dai romans”.

Glesie dai Gjai

La Glesie e je stade fate su sot de conduzion pastorâl di don Plinio Freschi ancje graziis al contribût materiâl e economic de int dal paîs. La glesie dedicade a Sant Antoni e je stade screade ai 8 di Dicembar dal 1965.

Notis par cure di Luigi Del Piccolo (Luîs Dal Piçul) – Vice president de Associazion culturâl 'Ad Undecimum'.