Comun di Sant Zorç di Noiâr
Noiâr
versione italiana
Significât dal non:
Il non al ven de peraule latine/neolatine nux, nuce ven a stai cocolâr. Il sufis –âr/-aro al indiche abondance, alte frecuence (ad XI 1992).
Une volte Noiâr (cun dutis lis sôs variantis) al indicave sedi la vile che il flum.
Ubicazion e notis storichis:
Toponomastic antîc. Frazion di Sant Zorç a uns 2 chilometris dal cjâf lûc. Intal 1429 il Cjapitul di Aquilee, suntune dispute fra i paîs di Sant Zorç e di Noiâr cun Morsan di Strade, al sentenzià disint che ... inte Selve Comugne che si cjate fra la Ara di Dols, Zilmon, l’Arvoncli, la LEVADA DI CARISACO e la Tavele di Pampalune, dutis e trê i nomenâts paîs a puedin comunâ (val a disi là a passons cu lis bestiis), boscâ, fa lens e seâ... Intal 1475 si pense che e fos une fortificazion intal borc di Noiâr, cuntun fossâl atôr dal paîs inte bande no protezude dal flum, come al di là dal Tiliment parsore dal flum di Palaçûl, intal lûc fortificât di Noiâr (NOIARII CASTRO)... Intun document dal 1500 si ... ordene ai abitants di Sant Zorç e di Noiâr, jenfri il tiermin di nûf dîs, di netâ il flum che al passe par i lôr paîs di mût che lis barcjis a rivedin a passâ liberementri, sot pene di une multe di 100 liris... Za intal XII secul il paîs di Noiâr al jere un comun rurâl indipendent. Lu restarà sin tal 1807 cuant che Napoleon, cul so riordin dai comuns, lu fasarà deventâ une frazion di Sant Zorç.
Glesie di Sant Leonart
Significât dal non:
La glesie e je dedicade a Sant Leonart. Il cult dal sant a si è pandût intal Friûl atôr dal XI secul e, intal calendari de Glesie di Aquilee, la fieste si cjate ai 6 di Novembar dal 1240.
Ubicazion:
Noiâr, toponim antîc in vie dal Puart su la drete dal flum Cuar. Dintor de glesie al jere il vecjo simitieri.
Notis storichis:
La date dai 18 di Març dal 1467, iscrite intune piere a cempli che e jere part de antighe pile de aghe sante, cumò murade, e je di sigûr la date di dedicazion de gleseute, fieste ricuardade intal 1570. Intal viers a sud de aule e je ancje vuê conservade un avancuarp par l’altâr de Madone de Nêf. La sô fieste intal calendari de glesie di Aquilee si cjate ai 5 di Avost dal 1338. Si pense che prime de gleseute corinte e sedi stade une plui antighe. La conferme e ven de scuvierte di une buchete, databile prime dal an 1000, che e jere aprûf al arc de ancone de Madone.
Notis par cure di Luigi Del Piccolo (Luîs Dal Piçul) – Vice president de Associazion culturâl 'Ad Undecimum'.