Comun di Sant Zorç di Noiâr

Ziline

passa alla versione italiana versione italiana

Significât dal non:

Il non al ven dal sloven Celina ven a stâti teritori pustot, bandonât, spoi. Di notâ che il paîs e il flum a àn il stes non e ducj e dôi lu cjapin dal teritori li ator. L’abitât al è di probabile origjin sclave, forsit fat su subit dopo il X secul apene finidis lis teribilis invasions dai Ungars. (1991, C.C.DESINAN).
Ancjemò vuê si conte une liende dulà che, in timps une vore antîcs, une tribù di nomads rivade di soreli jevât, si sedi fermade in chest lûc e che une zovine principesse di non Ziline, fie dal Re de comunitât, dopo jessi sparide e sedi stade cjatade muarte lunc lis rivis dal flum forsit copade di cualche bestie in un lûc alore ancjemò salvadi.
Lant daûr dai sôi antîcs cerimoniai e inte disperazion di ducj, la zovine principesse e fo sapulide intal flum e il so non al fo dât al flum e al teritori convicin. Dopo di chescj acjadiments des fameis a larin a sta li fasint nassi il borc. Dutcâs cheste e je dome une liende e la ipotesi di une origjin dal non di cetancj personaç no à nissun valôr.

Ubicazion e Notis Storichis:

Ziline e  je une frazion dal comun di S. Zorç di Nojâr che si cjate a un 2 chilometris dal cjâf lûc di lunc de statâl SS14 Vignesie Triest. La documentazion dal non plui antighe e je dal 1239 = VERETIS ZILINE; (SGCE pag. 43 a.1300) = CELINE; (1350)= GRAVAM ZILINE; (1489)= ZILINIS.

Glesie di Ziline
Significât dal non:

Toponim resint in viâl Vignesie.
La glesie e je dedicade ae IMACOLADE DI MARIE, la prime piere e je stade poiade ai 12 di Avost dal 1948 e e je stade completade sot la direzion pastorâl di don Bepo Minighin prime e don Bruno Rosselli dopo, cun il contribût materiâl e economic di dute la popolazion che, par chest, ae fin de vuere e à disdrumât il cjamp di aviazion militâr.
Il ciment gjavât fûr de piste al è stât trasmudât intai modons doprâts dai paisans par fa sù la glesie. La benedizion solen e fo celebrade intal Nadâl dal 1949 e l’indoman, dì di Sant Stiefin, e fo fate la prime messe.

Notis par cure di Luigi Del Piccolo (Luîs Dal Piçul) – Vice president de Associazion culturâl 'Ad Undecimum'.